അടിക്കുറിപ്പ്

അടിക്കുറിപ്പ്

കൈയിലൊരു കോപ്പ മദ്യവും
ചുണ്ടിലൊരു പുകക്കുഴലുമായ്
എന്റെ ഭൂമിയുടെ പർണശാലകളിലേയ്ക്ക്
നീയതിക്രമിച്ചു കയറി
എന്റെ ഭൂമിയുടെ ചെറുതും വലുതുമായ
സങ്കടങ്ങളും സന്തോഷങ്ങളും
നീ പതിയിരുന്നു കണ്ടാഹ്ളാദിച്ചു
നിനക്കതൊരവധിക്കാലവിനോദം
പലരെയും പിന്നിൽ നിന്നാക്രമിച്ചു നീ
ചുമന്ന ചായമിട്ട കൃത്രിമപ്പൊയ്കയിലിരുന്ന്
പ്രകടനശാലയിലെ
നിന്റെ കാമസ്നേഹത്തെക്കുറിച്ച്
പ്രബന്ധമെഴുതുന്നുവോ നീ
സ്നേഹത്തിനൊരു പ്രകടനശാലയുടെ
ആവശ്യമില്ലെന്നു പോലും നിനക്കറിയില്ലല്ലോ
നിന്നെക്കുറിച്ചിങ്ങനെയൊന്നുമല്ല
എന്റെ ഭൂമി കരുതിയത്
കടൽക്കാക്കകൾക്കരികിൽ
നീ കണ്ടുകൊണ്ടിരിക്കുക
ചുമന്ന പുള്ളികളുള്ള
രാത്രിയുടെ മുഖമുള്ള
തുറിച്ച കണ്ണുകളുള്ള പുള്ളുകളെ....
ആരുടെ മഹത്വം
നീയിന്നുൽഘോഷിക്കുന്നു
അതിനൊരടിക്കുറിപ്പെഴുതാൻ
വാക്കുകൾ സൂക്ഷിയ്ക്കാം
ശിശിരത്തിനുള്ളിൽ...
മഞ്ഞുപാളികൾക്കുള്ളിൽ...