Tuesday, July 12, 2011

പറയേണ്ടതിലേറെയും നീ പറഞ്ഞു കഴിഞ്ഞുവല്ലോ?

പ്രിയപ്പെട്ട കുട്ടീ,
നിന്നോടിനിയെന്തു പറയാൻ
പറയേണ്ടതിലേറെയും 
നീ പറഞ്ഞു കഴിഞ്ഞുവല്ലോ?
നീ പറയുന്നതും, പറയാനിരിക്കുന്നതുമെല്ലാം
ശരി തന്നെ..
നീയെഴുതിയിടും കത്തുവായിച്ച്
ചിലരെഴുതിയിടും മറുകുറിപ്പുകൾ
വായിച്ച് നീ വേദനിക്കാതിരിക്കുക
ആളുകളെ പരിഹസിക്കുകയെന്നത്
ഒരു ദിനചര്യയാക്കിയവരാണവർ
അവർക്ക് നിന്റെ വിഷമമൊന്നും
മനസ്സിലാക്കാനാവില്ല..
അതിനാൽ നീ നിന്റെ 
ഹൃദയമടച്ചുപൂട്ടിയെവിടെയെങ്കിലും
സൂക്ഷിക്കുക..
തുറന്നിടും ഹൃദയത്തിനൊരുപാടു
മുറിവുകളുണ്ടാകും
അതുപിന്നീട് തുന്നിക്കെട്ടാനുമാവില്ല
അതിനാലിനിയെങ്കിലുമതിനുള്ളിലെ
ശരത്ക്കാലവർണങ്ങൾ തൂവിയിങ്ങനെ
നീ കത്തുകളെഴുതാതിരിക്കുക
നിനക്ക് മറുകുറിപ്പെഴുതാനെനിക്കാവുന്നുമില്ല
എങ്കിലും പറയുന്നു
പ്രിയപ്പെട്ട കുട്ടീ,
ലോകം നീ കരുതും പോലെയൊരു
ഗ്രന്ഥപ്പുരയല്ല
അതിനുള്ളിലൊരുപാട്
പ്രിയമല്ലാത്ത സംഭവങ്ങളുണ്ടായി
എന്നും വരാം...
അതിനാൽ നിന്റെ ഹൃദയമുടയാതെ
നീ സൂക്ഷിക്കുക..
ചുറ്റുമുള്ളവർക്കാവശ്യമെന്തെങ്കിലുമൊരു
തമാശക്കഥയായിരിക്കും
ഉടഞ്ഞതെന്തുമെടുത്തവരെറിയും
ഒരു കളിപ്പാട്ടം പോലെ..
ഹൃദയത്തിലുറങ്ങും, കവിതയോ
സ്വപ്നചിന്തുകളോ ഒന്നും
അവർ കണ്ടെന്നും വരില്ല
പ്രബോധനങ്ങളുടെയെഴുത്തുകൂടിൻ
സാമ്രാജ്യത്തിൽ നിന്റെയെഴുത്തുകൾ
വെറുമൊരക്ഷരലിപി..
അപ്രിയങ്ങളായ അനേകമനേകം
അക്ഷരങ്ങളിവിടെയുയർന്നേക്കാം
അതു മറന്നു കളയുക..
നല്ലതെന്നു തോന്നുന്നതിനെ മാത്രം
നോക്കിക്കാണുക..
കത്തുചുരുക്കുന്നു...

No comments:

Post a Comment