ഋതുക്കളെന്തെയേങ്ങിനെ

അതങ്ങനെ
പോയതൊക്കെ തൂത്തുവൃത്തിയാക്കുമ്പോൾ
പിന്നെയും നീട്ടുമൊരു ചുമർചിത്രം
ഇടുങ്ങിയ വാതിൽപ്പാളിക്ക്
പിന്നിലെ പിൻബുദ്ധിക്ക്
മാത്രമറിയുന്ന തുറുപ്പുചീട്ടുകൾ
ഇത്രയേറെ ലോകം കണ്ടതിതിനോ
സമാധാനപാലകരിങ്ങനെയോ
വട്ടമേശകൾക്കരികിലിരുന്നെഴുതുന്ന
സുപ്രധാനതീർപ്പുകളിങ്ങനെയോ
അറിയാതെയറിയാതെ
നടന്ന വഴികളിലിന്നും
കൽച്ചീളുകൾ
കൽച്ചീളുകളുടെകൂടകളനുദിനമേറുന്നു
വേണ്ടെന്നറിയിച്ച്
തിരികെയയ്ക്കുന്നതിൻ കൂടെ
വീണ്ടുമെത്തുന്നു പുതിയവ..
ഉദയസൂര്യന്റെ നാടിന്നസ്വസ്ഥം
അകലെയാരൊക്കൊയോ
ആഹ്ലാദിക്കുന്നു
ലോകാവസാനദിനമെന്നാണാവോ
ഭൂചലനങ്ങൾക്കരികിലും
ഋതുക്കളെന്തെയേങ്ങിനെ
നിസംഗതയുടെ പുടവചുറ്റുന്നു....