അനേകമനേകം
മുഖങ്ങളിൽ അന്തരംഗത്തിനെ
മറച്ചവനേ
ചലിക്കുന്ന സ്വനഗ്രാഹിയിൽ
ഗ്രഹമിഴിയേറ്റിയോനേ
നിന്റെ ഭാഷയുടെ രൂപാന്തരമോ
ഒരു ശൈത്യം
അയാഥാർഥ്യങ്ങളുടെ പട്ടിൽ
ഹോമപാത്രത്തിലേയ്ക്കിടാൻ
നീ തേടിയതോ
ഒരു ശരത്ക്കാലവർണം
ഇന്നും ചലിക്കുന്ന സ്വനഗ്രാഹിയിലൂടെ
വികലസന്ദേശങ്ങളായ്
കടൽത്തീരത്തേയ്ക്കണയുന്നതാരുടെ
കൈമുദ്രകൾ?
സത്യമായ മൗനത്തിനെന്നുമൊരു
സ്വാന്തനലയമുണ്ടാവും
പരാജിതന്റെ രക്ഷാകവചമോ നിന്റെ മൗനം?
ഒന്നുമാത്രമൊരു സത്യം
നിന്നെയറിയാതിരുന്നിരുന്നെങ്കിൽ
നിഴലണിയോടെതിരിടാൻ
ഈ ഭൂമിയ്ക്കൊരു ശിരോകവചമന്വേഷിച്ചു
നടക്കേണ്ടിവരുമായിരുന്നില്ല
മഴക്കാലങ്ങളുടെ സ്വരലയത്തിൽ
കടലിരമ്പം തേടിയലയണ്ടിവരുമായിരുന്നില്ല
ന്യായവാദങ്ങൾ സൂക്ഷിക്കും കനത്ത
ഇരുമ്പഴികളിലൂടെ കണ്ട അന്യായരേഖകൾക്ക്
സാക്ഷ്യം നിന്ന ഋതുക്കളേ
മടങ്ങുമ്പോൾ ഉപേക്ഷിക്കാമീ
പുതിയയുഗത്തിൻ നീതിപർവങ്ങൾ,
പുരസ്കാരങ്ങൾ..
No comments:
Post a Comment